中環出更：林奮強：港人貪方便自願「一孩」
由前行政會議成員林奮強（圖）創立嘅智庫「香港黃金五十」，早排發表咗一份有關香港人口問題嘅報告，建議未來要引入多廿萬外來人才。林奮強尋日繼續喺電台節目推銷有關建議，指香港人喺回歸前後，因各種因素自願奉行「一孩政策」長達廿五年，唔少人又因為覺得「愛、家庭同生仔」，都係「唔方便嘅事」，因而遲遲唔肯結婚生育，甚至連拖都唔想拍，要令香港經濟繼續發展，最直接都係要借助外援幫吓手。
倡引入外來人才
林奮強指出，香港人自八幾年、開始討論回歸起，就唔想生小朋友，一來擔心香港同自身前景，二來擔心生多個會冇咁易移民，到回歸後香港又遇着金融風暴、負資產同沙士等連場打擊，搞到好多人自願推行一孩政策，而且一推就廿五年，出生率低同人口老化問題，仲嚴重過有強制性一孩政策嘅內地。
林奮強又話，上述問題好多依家已經唔再存在，但港人仍以「唔方便」為由而唔肯結婚生育。以前由內地偷渡嚟香港嘅人，就算無父母幫手湊仔，閒閒哋都生五、六個，但依家啲人就貪方便，無得用智能手機隨時上網，就好似叫佢去死咁，令到「愛、家庭同生仔」呢啲「唔方便」嘅嘢，好多香港人諗都唔想諗！
卓妮