中環出更：男飾翡翠 羅志光戴得起
翡翠玉器貴氣優雅，名媛淑女佩戴更顯氣質，但好少男士戴得好睇。香港玉器商會早前舉行三十八周年晚宴，卓妮見會長羅志光嘅西裝衣領上有一枚由翡翠及閃鑽鑲嵌而成嘅襟針，十分搶眼。佢笑笑口話，呢枚飾物叫做「事業如意」，係佢自家設計，其中玉器由代表事業嘅蜥蜴及代表如意嘅靈芝組成，再加上碎鑽鑲嵌，夠晒新穎，又好意頭，至啱男士佩戴。
當晚好多玉器業界人士齊集，包括身兼商會永遠名譽會長嘅博愛醫院副主席吳錦青、太子珠寶鐘錶執董朱繼陶等人，仲有仁濟醫院副主席蘇陳偉香及總理鄭李華熙、吳志斌等人。現場展示近百枚翡翠珠寶以開心一口價供賓客認購，仲有靚花膠及玉器拍賣，氣氛好高漲。當晚籌集嘅款項將撥出三十萬元捐贈予仁濟緊急援助基金，難怪咁多仁濟人去撐場啦。
吳錦青享湊孫樂
吳錦青太太黃海燕及家族做地產生意嘅世姪女嚴煥兒（Mona）亦有到場，Mona好開心話，佢啱啱加入咗香港青年聯會，希望同班兄弟姊妹齊齊做好青年工作。近期榮升外公嘅吳錦青好享受湊孫樂，佢大女吳嘉瑩兩個月前誕下首名BB仔，呢位外公盛讚外孫好靚仔趣致，成日撩人傾偈喎。
講起佢間位於銅鑼灣旺區嘅鐘錶店生意，吳錦青呻話，受到內地客消費態度謹慎影響，生意大打折扣，昔日盛況不再，但係佢就睇好玉器前景，始終翡翠係獨一無二。羅志光都話，十年來翡翠累計升值四百五十倍，雖然依家經濟放緩，但係優質玉器價錢依然繼續升，事關玉石買少見少，愈靚愈多人爭。
卓妮