政情：項明生過檔智傲 搞手機遊戲
旅遊作家項明生（James）早前突然宣布辭去Sony Computer Entertainment香港分公司董事之後，連日來各界不停揣測佢嘅去向，答案尋日終於揭盅，James將出任本港最大嘅網絡遊戲商智傲集團行政總裁，夥拍公司董事長施仁毅一齊搞手機遊戲。明日James返工首日就會搞第一場騷，宣布香港首個手機遊戲資訊平台成立。
同老友施仁毅拍住上
James話，佢同早年由福建來港嘅施仁毅係多年老友，事關兩人都係遊戲界，又一樣係內地來港嘅新移民，所以好啱傾。記得○七年四川大地震，佢哋仲聯手發起遊戲界賑災籌款活動，為四川災民籌得廿幾萬款項，自此更加投契。
咪以為James係高薪跳槽，其實佢唔係僱員而係拍檔，冇得計人工，而係靠派花紅。James最開心係從此告別返工嘅日子，有更多時間去旅行，今個聖誕佢將去芬蘭探訪聖誕老人村，然後去睇北極光，一於玩番夠本先。