政情：理大搶地 「駁長」紅隧
咪以為淨係政府為建屋盲搶地，其實呢股「搶地風」已經蔓延到各大學院校。繼早前浸會大學師生捍衞九龍塘李惠利地皮，搞到滿城風雨後，原來理工大學都（目及）實校園對出條紅磡海底隧道九龍入口收費廣場，想喺上面加建一個橫跨理大至東鐵紅磡站嘅上蓋平台，類似明渠加設上蓋咁發展。雖然理大校長唐偉章用環保同建設社區嘅口號將構想包裝到好完美，但理大多咗平台，唔知會否將校園內原有嘅康樂設施改作起樓之用呢？
唐偉章尋日出席校內每年一度嘅校長學生交流會，有學生追問學校嘅發展情況。佢就提到紅隧入口收費廣場嘅空氣污染好嚴重，所以最近開始同政府溝通，想喺收費廣場上空加建上蓋，並將管道內汽車排出嘅廢氣集中處理後再排走，而所得嘅平台用地經綠化後可開放予公眾使用。唐偉章表面上講到好環保咁，但佢就笑笑口入正題話：「咁我哋都有私心嘅」，就係想申請將部分平台空間用來興建運動場等學校康樂設施。
稱改善空氣 擬建康樂設施
唐校長仲話，呢個構想同時亦為理大師生往返校園同東鐵站提供更寬闊嘅道路，出入方便之餘亦可以享受清新空氣。不過，呢個建議就變相加長咗紅隧管道，將來每日逾十萬架次嘅車輛要喺管道內排隊到收費廣場畀錢，除非管道通風及廢氣排放系統做得好，否則司機們要被迫吸廢氣。再者，喺紅隧收費廣場上空加建上蓋，造價不菲，呢筆錢係咪要納稅人找數呢？抑或係理大自己籌錢興建呢？將來嘅維修費又係邊個畀呢？
至於理大早前申請何文田一塊靠山坡地皮興建學生宿舍同教學樓，唐偉章就話計劃已經過咗幾關，打算建設時加入貢獻社區嘅元素，例如成為何文田山上居民落山嘅通道，唔使居民吓吓要搭車，現正希望收集多啲學生嘅意見交畀城規會考慮。兩個校園擴建方案都係打住建設社區及環保嘅口號而行，睇嚟今次理大係有備而來，唔知政府官員點招架呢？