「絕代雙貪」影衰廉政公署幾經辛苦建立嘅「廉潔奉公」核心價值；廉署昨日起推出新一輯宣傳廣告，除了配合明年廉署成立四十周年，相信更重要嘅任務，係要挽回公眾對廉署嘅信心！
新一輯廣告標語係「發展各異，訴求一致，為下一代，共建廉潔將來」，廣告拍攝唔同ＢＢ神態，有笑有喊有踢腳仔，從中「估計」佢哋將來做咩職業。老朽但願，咁可愛潔白無瑕嘅ＢＢ，要有個好嘅環境培養佢哋，否則即使沒有「貪遍省港澳，歎盡海陸空」嘅長官出現，或者「大花筒」嘅酒中仙獻世，香港社會，怕都難世世代代維護這廉潔奉公嘅核心價值。
唐朝詩人元稹，原為監察御史，後因彈劾貪官暴吏，得罪了權臣被貶官，最終任通州司馬，生活清苦，寫了封信畀老友白居易，白居易看了信，悵然良久，寫了四首七律，其中一首云：通州海內悽惶地，司馬人間冗長官。傷鳥有弦驚不定，臥龍無水動應難。劍埋獄底誰深掘，松偃霜中盡冷看。舉目爭能不惆悵，高車大馬滿長安！
老朽特別注意詩中所說「蛟龍不能失水」的問題，換言之，一個社會要使人才充分發揮其作用，由ＢＢ出世那一刻，確實需要有良好嘅社會和客觀條件，否則佢哋即使腳仔踢到幾高，奇才蓋世，將來成功做到高官甚至封爵，亦一樣未必造福人群，益到社會！
講真，廉潔社會離不開公平公正，然而，如何讓市民看到廉政架構的力量，端賴其是否調查、執法不偏不倚；唔好話老朽又舊事重提，貪曾被本報踢爆其劣行，可謂罄竹難書，可廉署至今依然「密密實實」。畢竟反貪防腐不是講童話，再美麗動人的舉報貪污廣告，不去落實懲奸鋤貪的任務，明天吾人仍然會在街上見到凍斃的小女孩！