人好難接受變老，但旅遊作家項明生（James）就一啲都唔介意。話說佢最近重遊印度，感觸時光飛逝，於是喺社交網站放上廿幾年前遊印度恒河嘅陳年舊照片，後生版嘅James個樣好青澀、稚氣，夠晒清純。張相曝光之後，數百名粉絲狂畀Like，James笑笑口話，覺得好意外喎！
James話，當時係上世紀九十年代，佢仍喺香港大學讀書，自言係貧苦學生，要打四、五份工賺錢交租同食飯，剩低嘅錢就儲起去旅行。有一年暑假，佢一個人到印度及尼泊爾旅行兩個月，畢生難忘。相中嘅James頭髮略長，好整齊咁梳埋一邊，又戴住眼鏡，個樣好稚氣。
上月James重遊舊地，乘艇仔遊恒河時影咗一張相，佢先至醒起當年好似有張類似角度嘅相片，於是摷返出嚟擺上網。佢慨嘆「時間是恒河裏的一粒沙」，相隔廿多年，河未變，但河上嘅人卻變咗樣。