政情：康文署焗工展會明年加租
中華廠商聯合會副會長兼廠商會展覽服務有限公司主席吳永嘉（Jimmy）早前證實，今年康文署忽然改變維園工展會展位租金計算方法，由本來嘅只收取門券總收入一成，改為再加收總收入嘅百分之七，變相加租四倍。Jimmy日前出席活動時透露，雖然今年商戶唔使捱貴租，但明年無可避免要加租，預料加幅一成多。
由於廠商會年中已經同八百多個攤位嘅公司簽約，對於康文署突然加租，搞到該會焗住要承擔相關額外開支。Jimmy話，廠商會作為非牟利機構，旨在振興本港經濟，所以就算今年政府加佢哋租，蝕本都會照畀錢，但係真正蝕幾多就仲未知，事關要等工展會完結後，計算總收入同入場收益先至知。
吳永嘉：仍相對廉價
Jimmy坦言，考慮到廠商會嘅營運開支壓力，明年就要向租戶加租，但加幅會「就住」唔會高過兩成，而工展會展位嘅租金同其他展會相比，已經係最廉價，即使加租，依然會比其他展會租金相宜，唔擔心明年加租後，會影響招商意欲喎。