政情：財案提早辯論疑「布」局?
立法會秘書處近日印製好新一個立法年度嘅月曆，顯示全年度開會日期外，仲透露了來年施政報告會喺一月十五日公布，至於二○一四至一五年度財政預算案就會喺二月廿六日發表。不過，預算案二讀辯論就會喺來年四月九日開始，比本年度早咗個幾星期辯論，唔通當局吸取咗今年預算案拉布戰，以及近日美國聯邦政府「停擺」鬧劇教訓，故意預多少少時間應付新一輪預算案拉布戰？
如果大家記得嘅話，部分泛民主派議員為咗迫使政府推行全民退休保障計劃，喺今年四月針對二○一三至一四年度預算案進行拉布，差啲搞到港府要好似依家美國政府咁，因為無錢出糧畀公務員而被迫暫停公共服務。嗰次拉布行動最後持續咗差不多一個月，到五月廿一日先正式三讀通過預算案，僅僅避免到政府陷入癱瘓，令財政司司長鬍鬚曾鬆一口氣，亦避免長者生活津貼發放受影響。
曾三月底進行
明年預算案辯論提早咗係四月初開始，比今年明顯早咗，就算有議員密謀再玩拉布，政府都變相多咗時間準備迎戰，令人猜測明年提早辯論係政府刻意安排。
不過，有熟悉相關程序嘅官員透露，其實預算案辯論日期一向無明文規定，最主要係遷就復活節假、每年三月喺北京舉行嘅人大政協兩會會議、以及政府與立法會同期舉行嘅其他活動，所以一般都係四月初開始辯論，早起上嚟亦試過三月底開波，今年拖到四月下旬開始辯論反而遲咗。
毓民預告行動
不過，最重要嘅係，即使包括「長毛」梁國雄在內嘅「拉布四子」下定決心再玩拉布，就算提早一個星期辯論預算案，都只係會拉布多一個星期，最多咪養足精神、潤定喉嚨噴多啲口水嘅啫，所以提早辯論根本無任何實質作用，因此來年嘅預算案時間表與拉布問題完全無關。黃毓民就講過，如果南區區議員馮煒光一旦做咗政府新聞統籌專員，佢就一定會再次拉布，以示抗議有關任命喎。