中環出更：林偉強帶鄉紳去「浦」
鄉議局尋日開執委會，宣布將於本月十九至二十四號去上海浦東幹部學院舉行首次國情研習班，共有三十七名成員參加，未能同行嘅主席劉皇發自掏腰包贊助學員一半學費，即每人一千元，仲搵咗副主席林偉強帶隊。不過，林偉強試過喺內地有「不良紀錄」，曾被人見到同一名女伴夜晚去飲茶撐枱腳，被熟人目擊成個過程，莫非發叔唔怕林今次帶成班鄉紳去威咩？
訪滬研習國情
林偉強就話，今次行程好緊迫，而且好嚴肅，純粹同大家去溫故知新，學習國情喎。據聞除咗元朗六鄉，包括錦田、屏山、廈村、十八鄉、八鄉及新田嘅鄉事委員會主席參加外，上水、沙田、荃灣及大埔等鄉委會都有主席或副主席參加，認真熱鬧。
卓妮睇番佢哋今次嘅行程，又真係幾緊迫，學習內容包括國際形勢、《基本法》輔導、城鎮化進程、以及中國近代史同近代嘅香港等。除咗第一日晚上扺埗有聯歡活動，其餘四日都由早上八點半鐘開始上課，中午有幾個鐘頭休息及午飯，之後又要聽講座或參觀至下午五點半鐘才結束。至於五點半鐘之後有咩活動？咁就要問林偉強有乜安排喇！
卓妮