中環出更：趙式慶暢談子女經
商人趙世光嘅孺仔趙式慶近年高調宣揚中國武術，但就鮮有談及家人嘅事。不過，佢日前出席老友「手套女王」昌利行董事林曉盈（Juliana）嘅公司成立五十周年晚會時，除咗興奮推廣其成立嘅「地脈基金會」外，一講到仔女，即由不苟言笑變為慈父上身，大談仔女性格。
囡囡斯文 囝囝好動
趙式慶話，四歲大女性格好女仔，鍾意跳舞同畫畫，反而對武術冇乜興趣；而細仔只得一歲，未係時候學功夫，但性格都幾好動喎。佢話，會對子女嘅入學問題保持自然心態，正如自己細個時，爸爸對佢從來都唔擔心。話說佢於英國留學畢業後，曾到內蒙古居住一年，於浩瀚大自然中遊走，深感快樂同滿足感非物質所能賦予。
近年趙式慶有感中國文化正「病危」，亦關注內蒙古少數民族文化逐漸消失，四年前便成立「地脈基金會」，供養當地山區貧困兒童上學之餘，將音樂、語言等非物質文化一一記錄，協助其保育及承傳，自此經常穿梭中港兩地，積極推動保育工作。
林曉盈嘆守業更難
講番晚會，主人家Juliana身穿大露背晚裝艷壓全場，同父親林志權及母親Judy、契爺鄭泳忠熱情招呼嘉賓，工業總會榮譽主席鍾志平（Roy）、「鮮花公主」龔嬿、參加完電台「窮富翁大作戰」嘅廖創興家族後人廖偉芬、社企Green Monday聯合創辦人楊大偉、金利來集團行政總裁曾智明太太黎瑞恩都有捧場。
Juliana坦言，廠家唔易做，佢作為第二代掌舵人，深感「創業難守業更難」。阿Roy聞言就話：「冇守業，只有不停地創業」，勉勵對方要勇於創新。
卓妮