政情：公民講場：貪湯搞臭三軍會 收番笪地啦！

房屋政策係呢一屆政府嘅重中之重，所以要四處覓地建屋。有人建議向郊野公園用地打主意，亦有議員建議港府向中央徵用駐港解放軍用地起樓，甚至有議員質疑港英年代嘅槍會山軍營，回歸後已變成三軍會，仲開放畀公眾購買會籍享用設施，偏離當初服務軍人及家眷嘅原意。其實過去三軍會好少會有人提起，皆因「貪湯」前廉政專員湯顯明早前出席完立法會政府帳目委員會公審後，坐住部領事座駕直駛入三軍會逃避傳媒追訪，仲喺會所內嘅出租客房過夜，先至搞到三軍會個名蒙羞。連貪湯呢啲貪腐醜聞纏身嘅人都住得，唔怪得有議員建議政府收番三軍會笪地啦！