政情：拇指壞肌 大輝換機

立法會議員林大輝平時去到邊都攞住部黑莓手機，但佢尋日就換咗另一款智能手機，莫非趁新會期換新機？大輝解釋，因為早前不斷用左手拇指打電郵同傳短訊，結果搞到拇指發炎，有時仲成隻拇指都屈唔埋。大輝之後向食物及衞生局局長高永文請教，對方建議佢一係切咗左手拇指上已經壞死嘅肌肉，一係就打類固醇控制病情。大輝一聽到個「切」字就即時耍手擰頭，寧願打針改善拇指病情，依家仲索性換手機兼改用右手打電郵同短訊，避免病情繼續惡化落去。