壞升降機冇圍封 住戶嚇破膽
近年升降機事故頻生，旺角一住宅早前又發生居民誤闖壞升降機事件，險釀意外。一部維修中的升降機疑未有即時停用及圍封，有高層單位住戶如常進入，按鍵後升降機即出現異常，事後才驚悉所處升降機正處維修狀態。機電署承認涉事大廈對升降機故障的應變程序有改善空間，立法會議員則認為事態嚴重，要求機電署徹查事件，並向管理公司提供足夠指引。
「嗰朝好似平時咁升降機落樓，點知入到去一撳掣就有把人聲喺度尖叫，啲掣仲無喇喇着晒，好似啲鬼片情節咁，嚇死我！」阿珠（化名）憶述，事發當日升降機門如常打開，進入後即按下「Ｇ」樓層鍵後，升降機內的按鈕竟突然全部亮起，對講機更發出「喂！」的一聲大叫，令阿珠嚇得目瞪口呆。經過一番擾攘後，才得悉升降機原來正在維修，「個保安員仲問我點解可以入到部升降機，我都好想知道點解！乜維修緊唔係要鎖升降機嘅咩？有咩意外究竟邊個負責？」
機電工程署發言人未有正面回應事發原因，僅稱當日管理處發現涉事升降機因機廂門未能正常關閉，已在十二樓停止運作，隨即以膠帶圍封廂門，承辦商則於二十五分鐘後到場維修。發言人表示，雖然管理公司並未違反《升降機及自動梯條例》，但有需要改善升降機故障應變程序。
不過，阿珠卻對機電署的回應大感不滿，直指事件仍然疑點重重，加上升降機操作及管理牽涉居民安全，認為有必要徹查並作清晰交代，「如果真係停咗喺十二樓同埋有即刻圍封，咁點解我可以喺廿幾樓入到升降機，仲要入到升降機閂埋門先有保安員大聲叫我出番去？」
「機電署仲未吸取教訓」
「呢次冇人死傷只係好彩，但機電署同管理公司唔可以忽略件事嘅嚴重性，之前都試過有升降機喺維修嗰陣冇停機，結果有人唔小心跌咗落機槽死咗，點解機電署都仲唔肯吸取教訓，做好啲監管？」立法會議員王國興直指事態嚴重，要求當局徹查事故原因，並向管理公司提供改善指引，避免意外再次發生。
電梯業總工會理事長謝景華亦認為管理公司在事件中雖不涉及違例，但仍有改善空間。謝指升降機一旦處於非正常狀態，升降機會停留在合適樓層等候承辦商人員維修，期間管理公司應採用「雙欄制」，使用圍欄將主樓層及機廂圍封，避免住戶誤闖機廂，「如果要維修同檢查，部升降機停低咗就應該內、外各擺一個欄，咁安全性會高啲！」
記者：黃芷君