政情：有相為證：越南領館「大批少女」「新張八折」？

要尋花問柳唔使淨係落砵蘭街，我哋尋日發現金鐘道政府合署外牆有好介紹，有張宣傳單張以大大隻核突字體推介「大批越南少女到港」，而且「新張期間八折」，更附有地址方便男士們直接上門尋歡。我哋根據地址上網一查，發現呢個「新場」原來係越南駐港領事館地址，究竟領事館增設特別服務賺外匯，抑或被仇家惡搞？我哋打過多次電話去領事館但都冇人聽，唔通領事館不堪被人上門「撳鐘」索性關門唔辦公？不過，呢張「新場」街招貼喺政府合署當眼位置，律政司更加喺附近，唔通貼街招嘅人唔怕被人追究？