政情：大舊石減辣 泛民唔敢撐
立法會審議「買家印花稅（BSD）」嘅法案委員會進入逐條審議階段，地產及建造界石禮謙（大舊石）一早提出兩項「減辣」修訂，但現階段只獲商界支持，雖然佢極力游說泛民主派兩大黨，但兩黨立場至今仍舉棋不定，擔心一旦支持修訂，會令人聯想泛民同地產商聯手放寬炒樓。據聞兩黨寧願支持飲食界張宇人提出嘅近似修訂，都唔肯同地產商扯上關係。
近日勁發炮 無視民意
呢場BSD之戰，大舊石講明會瞓身同政府作戰，雖然佢尋日無開會，但都好緊張，就算身在海外都要發聲話，雖然中文大學有調查顯示六成市民撐維持辣招，但唔代表政府要跟民調做人，否則以後普選、高官去留都跟民調做事，真係唔知邊個大鑊啲喎。九唔搭八嘅嘢都可以相提並論，睇嚟大舊石今鋪真係身負重任喎！
雖然大舊石全副武裝上陣，但似乎民主黨同公民黨未願意「落疊」。據聞兩黨始終驚同地產商關係太密切，就算覺得修訂有理據，都唔敢第一時間支持，以免背後中箭。身為地產商嘅田北俊就睇中泛民弱點，原本諗住提修訂截大舊石胡，但為免利益輸送疑雲，於是改派黨友張宇人提修訂。
雖然張宇人同大舊石嘅修訂近乎一樣，但由於張宇人「地產味」少過大舊石，因而有機會成為泛民支持修訂嘅最佳落台階。據聞大舊石唔只被張宇人截胡，連部分偏向商界嘅泛民亦唔打算支持佢，好似資訊科技界莫乃光同會計界梁繼昌，已講明唔會支持豁免港人公司嘅修訂，否則成條BSD猶如被廢武功喎。
至於一直想奪回中產票源嘅白鴿黨，其實一直非常緊張BSD，該黨主席劉慧卿尋日仲化身商界代言人，話有唔少商界人士向佢反映，憂慮政府政策朝令夕改，會搞到啲投資者卻步喎。聽卿姐咁講，相信大家都估到該黨係咪支持「減辣」修訂喇。