中環出更：陳永棋五口家 畀雷劈都冇事
近期係各大社團搞十．一酒會嘅高峰期，尋日輪到香港中華出入口商會（中出）搞酒會，唔少政商界人士出席，連好耐無見嘅全國政協常委陳永棋都有現身。棋哥一到埗就話，佢早前一家五口喺意大利畀雷劈，啲雷仲兜口兜面劈中自己左腦，最終奇迹生還，真係唔知話佢好彩定唔好彩喇。
遊意國大難不死
陳永棋話，今年暑假佢同五個家人去意大利西西里島玩，本來風和日麗，但一登火山即時天變，萬里晴空變雷雨交加，正當佢想走避時，一道猛雷已從天而降，直劈落佢左邊天靈蓋。佢話當時感受到一股電力從頭頂一直貫穿至左腳腳趾尾，當時以為實死無生，點知最後左邊身麻痹三個鐘就無事，連醫生都唔使睇。
兜口兜面被雷劈都無事，唔通佢係雷神托世？陳永棋話，可能因五位家人同時被劈分擔咗電力，如果唔係一早死咗喎。
陳永棋大難不死，尋日就繼續議事論事，透露同立法會主席曾鈺成密斟幾分鐘，期間大讚曾鈺成近日發表嘅政改言論係「君子有承擔，睇嘢夠長遠，唔怕被人鬧」喎！
講開中出個會所，佢哋最近豪花二百四十萬元大裝修，換晒防滑地磚，連廚房都換晒新廚具，兼夾總廚都換埋，成個場煥然一新，睇嚟日後政界人士又多個聚會私竇喇。
卓妮