中環出更：東亞銀行凶廈 曾為貪曾競選辦
由李國寶任主席東亞銀行，旗下位於灣仔東亞銀行港灣中心分行前日發生一宗女職員疑因壓力大而跳樓嘅自殺案，該名女文員身穿紅色銀行制服由中心廿一樓女廁一躍而下，飛墮四樓平台身亡。事發後，有心水清嘅人醒起「貪曾」前特首曾蔭權爵士當年兩度競選特首時，就正好租用港灣中心一個全層寫字樓作為競選總部，唔知貪曾當年兩次租用嘅樓層，係咪正正係發生自殺案嗰層樓呢？
卓妮於是翻查資料，發現貪曾○五年準備參加特首補選、但未辭去署理特首職務時，就已火速租用東亞銀行港灣中心廿二樓全層做競選總部，比前日自殺案事發地點只係高一層。
當年已被指公器私用
想當年貪曾為咗扮神秘，起初連地下水牌都唔掛招牌，當大批傳媒到場採訪時，大樓保安即奉「東亞老細」之令擋住記者拍攝，除咗用電梯閉路電視監視記者行蹤外，仲要出動雨傘陣阻擋記者視線，可謂奇招盡出。
及至○七年，貪曾準備競選連任特首時，雖然佢又先租定競選辦公室，但今次佢就租用廿八樓全層，而非用番之前用開嘅廿二樓。不過，租咗呢個咁吉利嘅樓層都無用，皆因佢當時被傳媒指摘毫不避嫌乘坐特首座駕前往競選辦，途中仲要勞煩警車開路護駕，被炮轟「公器私用」公然利用政府資源為個人選舉造勢，原來嗰陣貪曾嘅貪婪、亂花公帑嘅劣行已經表露無遺。
卓妮