政情：履新露兩手 潘偉賢「鋸大餅」
中華電力新任總裁潘偉賢（Paul）本周一履新，但佢返工首日就已經坐唔定，跳出辦公室，去咗中電嘅電力工程學院，同一班正接受培訓嘅見習工程師同學徒交流。唔講唔知，阿Paul入職中電時曾接受過俗稱「鋸大餅」嘅電纜切割訓練，唔知係咪見到啲架生手痕，仲即場示範畀班九十後學員睇。
入行基本功 駕輕就熟
阿Paul履新第一件事唔係返辦公室，而係去咗電力工程學院探一班正接受訓練嘅見習工程師同學徒，佢仲喺班後生仔面前示範「鋸大餅」。雖然要切斷直徑八十毫米嘅金屬電纜可以話都幾吃力，但着住制服、頭戴工程帽嘅阿Paul依然表現淡定，駕輕就熟。原來阿Paul一九七四年加入中電時已經接受過相關訓練，佢當年仲試過連續鋸電纜鋸足一星期。
阿Paul表演完「鋸大餅」之後就話，「鋸大餅」係電力行業嘅基本功，年輕學徒可以透過「鋸大餅」訓練意志喎。「鋸大餅」後近四十年可以做總裁，班年輕人唔知點諗呢？