西貢區議會泛民主派同建制派尋日罕有聯成一線，齊齊鬧爆區議員方國珊（哪吒）先後十幾次喺港鐵站外非法籌款，行為令附近居民備受困擾，最後區議會以廿四票贊成、一票反對，通過對哪吒嘅譴責動議。西貢區議會主席吳仕福會後話自己同哪吒相識多年，如今見到後輩愈行愈遠，感到非常痛心，又批評哪吒成日發表與事實不符嘅言論，對區議會其他同事唔公平。
西貢區議會尋日召開特別會議，討論哪吒喺未經批准下多次喺區內進行非法籌款，違反區議員操守指引。尋日嘅會議係針對哪吒而來，不過佢喺開會前不足三粒鐘向區議會秘書處發送電郵話要請假。最後區議會喺未通過對佢嘅譴責動議之前，就先否決佢嘅請假要求。
哪吒喺請假電郵入面同時附上一份文件，指摘新民主同盟同樣有進行非法籌款，要求區議會一視同仁。新民主同盟立法會議員范國威即時發聲明澄清，話該黨七一當日領有正式籌款牌照，又決定向哪吒發出律師信，要求佢向范國威道歉，否則就會循民事途徑控告對方誹謗。