政情：鼎級高招 德成學嘢

萬棵包括花梨木羅漢松

坐擁多個高爾夫球場嘅觀瀾湖集團主席兼行政總裁朱鼎健（Ken），有個妙計都幾值得民政事務局局長曾德成參考。佢每年喺旗下高爾夫球場至少種一萬棵名樹，包括價值不菲嘅花梨木、羅漢松等，至今已種咗十幾年。若果粉嶺高球場學吓佢，第日成個山頭都係名樹，又開放畀市民去尋幽探秘，咁樣市民咪可以直接分享球場嘅增值成果囉！

其實如果粉嶺球場「被消失」，阿Ken應該會偷笑，因為球友將被迫搵其他球場打波，臨近香港嘅深圳觀瀾湖自然係得益者。不過阿Ken大大聲話反對，事關佢接觸高球已逾廿年，未曾聽聞有邊個國家將成熟嘅綠化用地攞嚟起樓，舊區重建或填海起樓就聽得多。佢反問，紐約中央公園位於市中心，佔地又夠晒大，但係有冇人打公園嘅主意呢？

可能對得綠地耐咗，日久生情，阿Ken堅決反對破壞綠地，亦反對郊野公園用作發展。佢回想廿年前，深圳觀瀾湖球場現址只不過係荒廢嘅垃圾堆填區，係佢哋畀好多心機至將塊地變成依家綠油油嘅模樣。就算到依家，阿Ken仍十分關注綠化，為咗抵銷發展球場及周邊設施而製造嘅碳排放，每年追種數以萬計嘅樹木以進行「碳補償」（Carbon Offsetting）。

既然要不停種樹，於是阿Ken索性買貴價樹苗，每年至少種一萬棵名樹，一來當係長遠投資，二來仲可以綠化環境，球手打波時又多咗賞樹嘅樂趣，一舉多得添。

證生態及發展可共存

隨便上網睇睇，花梨木十年價格上升幾百倍，至於羅漢松，一盆盆栽動輒幾千蚊。觀瀾湖喺廣東、海南等地有好大嘅球場，阿Ken年年係咁種，咪好快發大達？佢笑笑口話，雖然種樹十幾年，但至今從未斬過一棵賣錢。佢只係想話畀大家聽，生態與發展係可以共存嘅。