中環出更：自駕擦欄杆 曾鈺成中咒？
政界中人近日籠罩住一股「自駕魔咒」，唔少政界人士自駕時都出事，早前兩個月發展局局長陳茂波自駕炒車，最終要送院治理，行政會議成員林健鋒亦因為自駕時逆線行車，被控不小心駕駛。前日立法會主席曾鈺成自駕到港台錄影節目時，唔知係咪太心急，泊車時一嘢隊落去鐵欄杆度，好彩佢架車夠硬淨無刮花，唔使拎去重新噴油。
趕住去錄影 神奇無刮花
其實港台個停車場入閘位，條行車路都算幾窄，所以行事謹慎嘅曾鈺成，泊車時都小心翼翼咁不停望倒後鏡，仲要慢慢咁倒車。當日只見曾鈺成一味望右邊倒後鏡，顧到右顧唔到左，佢一踩油，架車即刻刮花左邊車身，當時身在車內嘅曾鈺成似乎未發覺，車身擦住欄杆而過，真係戥佢肉痛。
好彩一排鐵欄杆同牆身仲有少少距離，所以有鐵欄杆幫佢卸力，如果唔係，車身倒後鏡分分鐘報銷。曾鈺成一落車就趕住去錄影，所以都無睇架車有無整花。我哋尋日問佢架車到底有無損毀，曾鈺成就話好彩無事，架車亦神奇無刮花，所以唔需要維修，連噴油都慳番。
卓妮