中環出更：城中富二代 體驗基層苦
基層家庭嘅生活有幾艱難，相信含住金鎖匙出世嘅人未必明白。叙福樓集團執董黃傑龍（Simon）、廖創興家族後人廖偉芬（Jennifer）等富二代為咗更了解民間疾苦，決意參加電台節目《窮富翁大作戰》，體驗居住天台屋、每日只得五十元使用嘅貧民生活。開辦牛肉專賣店嘅Simon變身成小食店員工，當佢得悉有市民竟然因牛肉價高，整年未嘗過一口牛肉時，心酸得不禁掉下男兒淚。
Simon話，佢以前一向都唔相信有市場壟斷呢回事，只覺得小商戶嘅消失係社會汰弱留強嘅必然局面，但今次嘅貧苦體驗令佢重新反思。由於大作戰後仲要提出改善基層生活嘅建議，所以Simon計劃於旗下位於天水圍及黃大仙嘅食肆，試行每天捐出一百個飯盒予基層家庭，以及鼓勵同行一齊推動代用券計劃，藉此幫助基層家庭改善飲食質素。
黃傑龍廖偉芬瞓天台屋
至於創辦著名連鎖咖啡店嘅Jennifer，就喺節目中體驗兩極生活，日間佢要喺豪華酒店內執房，夜晚就住喺天台改建成嘅狹隘房間。Jennifer自爆話，佢自小已有皮膚敏感同哮喘，家人從來將屋企打理到好似診所咁乾淨，今次住天台屋，敏感又發作。不過，佢發現港人好有創意，可以將任何地方嘅空間改建成住所，嚟緊佢打算與建築師及設計師合作，將棄置家具改裝後送贈基層家庭。
今次有份參與貧苦體驗嘅仲有由投資銀行界女強人轉行做法國菜大廚嘅陳彥琳，以及藝人伍詠薇胞兄、「補習天王」伍經衡同女兒伍雅愉。
卓妮