政情：陳年黑白相憶「發」迹

有「新界王」稱號嘅鄉議局主席劉皇發都曾經做過「士前卒」，發叔近日接受所屬政團專訪，文章尋日上載至網站，除咗講述佢嘅發迹史外，仲附有幾張超經典兼有歷史價值嘅照片添，當年嘅發叔仲梳緊蛋撻頭。當中包括，發叔喺一九七○年出任屯門鄉事委員會主席後，同啲鄉紳及時任新界民政署署長黎敦義喺鄉委會門前嘅合照，仲有一張相係發叔仲未做鄉議局主席前，企喺前主席陳日新身邊，接待時任港督麥理浩。