政情：謝偉俊變身西環曳仔

獲邀入自由黨

阿Paul去年由立法會旅遊界轉戰直選時，獲得高人祝福，令九龍東十幾位建制派區議員群星拱照佢，最後成功當選。不過，佢近半年嘅言論都不時批評梁振英，到底喺西環心目中，佢仲算唔算「西環契仔」，已經成為一大疑問，近日阿Paul仲開到口話ＣＹ未能團結建制派，批評力度似乎愈嚟愈大。

由於阿Paul同自由黨田北俊槍口一致對準ＣＹ，政界盛傳田少多次力邀佢入黨，將佢由西環契仔打造成西環曳仔。阿Paul大方承認自從去年選舉後，雙方都有傾過，但未有結論。由於田少下屆未必再選，令自由黨本身都面對無人接棒嘅困境，如果獲得阿Paul加盟，起碼多個直選議員坐陣黨內，不過距離下屆選舉仲有三年幾，現時講咩都尚早。

九東選戰激烈

九龍東除咗阿Paul嗰位有變數，連雄霸九龍東多年嘅陳鑑林亦諗住退下火線，到底邊個承繼佢個位？九東地區人士估計以民建聯觀塘區議員洪錦鉉呼聲最高，佢話晒都叫觀塘區票王，地區功夫夠扎實。不過，亦有人話陳鑑林其實最想捧自己個仔陳俊傑，只不過佢自知陳俊傑火喉未夠，所以先無落力推薦。

同樣喺九龍東實力雄厚嘅工聯會，到底黃國健會否連選三屆，真係暫時未知。由於工聯會喺九龍東捧邊個都贏，所以有分析話現時專攻九龍西嘅鄧家彪，如果屆時選情危危乎，可以隨時過九龍東打穩陣牌，咁到時工聯會最起碼能穩守九龍東議席，總好過鄧家彪喺九西慘敗。