上任冇幾耐嘅美國駐港總領事夏千福，活躍程度同曝光率相當高，就算最近外交部駐港特派員宋哲當面警告夏千福，叫佢唔好插手本港事務，但似乎夏千福當係耳邊風。
原來夏千福上星期引薦幾位美國國會議員同泛民主派議員食飯，下星期又約見自由黨田北俊同商界議員林健鋒，唔知宋哲知道後會唔會眼火爆呢？其實夏千福履新後已經動作多多，但最近佢就更改約會政界人物嘅手法。例如上星期，佢知道一班美國國會議員訪港，夏千福就做中間人，搵埋白鴿黨黃碧雲、民協馮檢基同工黨李卓人食飯聯誼，聽講班美國國會議員好主動，一埋枱就即刻問香港政改有無機會通過，仲問埋邊個做下屆特首添。
除咗泛民，夏千福都好重視商界聯繫，下星期會約見田少同林健鋒，但呢次會面係由一間美國大型企業負責拉線，講明夏千福只係座上客，唔知係咪想減低兩人嘅戒心呢？其實唔止夏千福活躍，據悉連領事館人手編制亦大增，請咗唔少「特工」向唔同人士收風套料，睇怕呢場諜戰一定好戲連場。