中環出更：先睹慈山寺 項明生想靜修
尋日係農曆八月初一，最宜食齋禮佛，淨化心靈。旅遊作家項明生（James）尋日應大埔洞梓慈山寺邀請，偕幾位專欄作家入寺半日遊，期間參觀七十六米高嘅青銅觀音像、禪修室、鐘樓及園景，中午食埋齋菜才離去。慈山寺仍未正式開放，James得以一睹其神秘面紗，確係與佛有緣，難怪佢決定等寺廟開幕後，收拾心情去短期靜修。
「設防」禪修室 似三星酒店
James話，尋日上午佢哋幾個人應邀入寺參觀，由於現場仍未裝修完，所以有啲地方仍然係禁地，例如青銅觀音像嘅內部格局。不過，佢哋就得以一窺早前因工程糾紛，而被描繪為高度設防嘅禪修室。佢話，嗰間禪修室唔似傳說中咁豪華，裝修用色偏好灰黑等暗色，加上一間廁所，成個感覺似三星級酒店。
原來唔單止禪修室夠神秘，James話，戶外庭院使用嘅地磚都特別講究，除咗選用外國靚地磚外，喺鋪設時仲特別喺地磚之間留有隙縫，以便雜草從隙縫中自然生長，大有生生不息之意。撇除八卦心態，James覺得成個寺院確係難得嘅人間淨土，佢話寺院位於小山坡上，背山面海，海面波平如鏡，予人感覺好清幽，一啲都唔似身在香港。
James好享受慈山寺嗰種寧靜，直言睇到唔捨得走，於是靈光一動，決定等寺院開幕後去短期靜修！佢話，雖然自己唔係佛教徒，但都曾經去韓國寺廟靜修，亦跟從一行禪師靜修過，深深感受靜修有益身心。不過，香港好缺乏靜修之地，要去到鄰近嘅台灣、日本及韓國先至有，但依家有咗慈山寺，以後就唔使山長水遠跑去外地靜修喇！
卓妮