厚德街市似蒸籠

「明明係冷氣街市，但就又熱又焗，直情成個蒸籠咁，都唔知啲冷氣喺邊度！」林小姐不時於將軍澳厚德街市購物，自今年五月開始，即發現街市熱氣逼人，尤其角落位置的冷氣更嚴重不足，每次行逛不足五分鐘已汗流浹背，「搞到我都唔想嚟買嘢，每次拿拿聲買完就即刻走。」

「啲衫着一陣就濕晒」

街市檔主阿明（化名）表示，一個約八十至九十呎的舖位，每月需要繳交逾千元冷氣費，對繳費後無冷氣供應大感不滿，「錢就交足，冷氣又唔見有！」阿明指街市不少檔戶每日需於街市內工作逾十小時，雖然大部分檔位已自設風扇解暑，惜幫助不大，「唔郁都會出晒汗，啲衫着一陣就濕晒，每日至少都要換兩次衫！」

厚德街市冷氣不足，不少檔戶皆自行加設風扇降溫。

領匯加設冷風機作臨時改善，惟效用不大。

領匯發言人解釋，今年三月直接管理厚德街市後，已即時檢討及評估全面改善冷氣系統之可行性，經檢查後發現冷氣系統部分機件老化，需進行維修及更換，遂安排冷氣承辦商進行工程，包括深度清洗風櫃及加裝五台冷氣機，有關工程已通知所有檔戶。發言人續稱，工程期間已臨時加設四部大型冷氣機作為短期改善措施。

街坊心聲：劉太（街坊） 「我日日都嚟買餸，可惜呢度又熱又焗，有時真係寧願去超級市場就算！」

梁小姐（菜檔職員） 「呢度咁熱，畀你係客都唔過嚟啦，對我哋生意影響好大，差唔多少咗三分一（生意）！」

領匯監察：不能接受

當區區議員凌文海指厚德街市落成至今已近二十年，裝置機件老化可以理解，但更應全面維修，以免「整好一排又壞過」，「呢度都有廿年歷史啦，成日都有人投訴話冇冷氣，所以好應該全面檢查同維修，而唔係壞嗰部先整嗰部！」凌又認為領匯既然收取冷氣費，便應提供服務，「特別係夏天咁熱，問題更加嚴重！」

「三月接手嗰陣已經知道有問題，咁點解唔即時解決？」領匯監察主席陳寶瑩狠批領匯接手後多月仍未解決問題，情況絕不能接受，又指領匯早前曾於年報表示會為較舊街市進行提升工程，未料卻無視街市冷氣不足情況，「與其執靚啲街市，不如花錢處理一啲當務之急嘅問題！」陳寶瑩建議街市檔戶成立商會，與領匯爭取對等地位，日後倘遇有其他問題，亦可透過商會作代表向領匯施加壓力，藉以解決問題。

記者：詹海萍、伍思明