政情：公民講場：由頭驗到腳 鬍鬚曾非中產

財政司司長曾俊華（鬍鬚曾）幾個月前自稱鍾意飲咖啡同睇法國電影，所以屬於中產，隨即被人炮轟佢年薪四百萬元扮中產。智經研究中心尋日發布一個有關中產嘅調查，再次摑鬍鬚曾一巴。調查結果顯示，有五成半市民覺得中產嘅自置物業，應介乎二百萬至八百萬元，另外超過六成市民就覺得，月入介乎三萬至十萬元就叫中產，單睇呢兩點，鬍鬚曾無可能係中產啦。其實調查仲有問市民點睇生活品味同中產嘅關係，點知有四成市民覺得無生活品味都可以係中產，即係話唔飲咖啡、唔睇法國電影都無乜所謂。總之由頭驗到腳，鬍鬚曾都唔係中產囉。