政情:「董事變粉絲」盛品儒稱無悔

亞視前執行董事盛品儒自從公布辭職之後就無再現身。佢尋日終於喺青聯就職禮出現,佢低調入場,無人知佢嚟咗,到走嗰時先被記者發現。記者追住問佢有乜去向,佢話自己唔再係亞視董事,不過就做咗粉絲喎。

亞洲會致謝片增投訴

盛品儒保持一貫忍笑個樣,話自己「董事變粉絲」,唔打算捐錢支持被重罰一百萬元嘅亞視。盛品儒依家喺亞視無一官半職,佢聲言同亞視已無關係,不過一聽到「亞視係咪去到最後一刻」,佢就好似有感而發,獨白咗成分鐘,話自己三年半以嚟,帶領八百個員工,一齊作戰到佢走嗰刻,無後悔,亦問心無愧。盛品儒話希望前同事唔好氣餒,要愈做愈好,繼續努力,「因為ATV不斷喺艱難中成長」,又話會繼續睇亞視,做人要向前睇,無謂再糾纏其他嘢喇。

亞洲會製作嘅「謹此獻給James(即盛品儒)」片段仍然喺亞視多次播放,通訊事務管理局至尋日收到十一宗投訴,一日之內上升咗七宗。

第一手消息請下載on.cc東方互動iPhone/iPad/Android/Windows Phone Apps