政情：棄「潤滑劑」貪曾遺禍

居屋一直係香港基層「上車」嘅指望，不過自從九七年金融風暴，香港出現唔少負資產，當時嘅特區政府就決定喺二○○二年起全面停建居屋。貪曾二○○五年上場做特首，就翹埋手話明唔再起居屋，佢一時又話無地，一時又話受負資產教訓，唔想起居屋增加供應摧毀樓市，一時又話總之政府要全面退出房屋市場，堅決到無人可以動搖佢。

剛愎自用 畀人插爆

隨着人口增長同內地人湧嚟香港買樓，香港嘅樓市供應一年比一年緊張，望住不斷上升嘅樓價，想買樓嘅市民只能望樓興嘆。不過貪曾諗住做完個任期、坐夠私人遊艇同飛機就可以去深圳禮賓府歎世界，根本唔係同市民同坐一條船，即使四方八面要求佢復建居屋，佢仍然係愛理不理，又講風涼話，話就算復建居屋，都唔能夠即時解決問題，聞說當時嘅運輸及房屋局局長鄭汝樺都力勸佢復建居屋，不過貪曾剛愎自用，加上睇唔起女人，佢又點會聽意見呢？

佢任內最後嗰兩年，樓價實在升得太勁，復建居屋已經成為社會共識。但係貪曾又特別死要面，於是諗到搞置安心同新居屋等嘅騎呢居屋。不過當時已經太遲，市民唔可以安居樂業，貧富懸殊又嚴重咗，民怨已經難以壓抑。香港喺貪曾手上搞成一個爛攤子，所以當張炳良話「居屋係置業途徑，亦係公私營房屋之間嘅潤滑劑」，就講明貪曾停產潤滑劑，對香港造成幾大傷害。香港今日病入膏肓，真係多得佢唔少呀。