中環出更：性感女模入新民黨 葉太尷尬
近年左中右政黨都多咗年輕人從政，但肯從政又青春貌美嘅好少，所以早幾個月新民黨有位年輕模特兒趙哲妤（Uny）入黨，都引起一陣騷動。聽聞黨主席葉劉淑儀嫌Uny大行性感路線影響黨形象，Uny就話自己入黨後已拒絕所有比堅尼工作，早前有美容院以六位數字利誘佢拍三點式瘦身廣告，佢都唔敢接，力證自己好聽話。
Uny未入政黨前，經常接拍三點式泳衣同婚紗廣告，葉太一早對佢入黨有微言，聽聞葉太手袋仲專登保存一張Uny極性感嘅剪報，不時拎出嚟同人呻話好羞家。點知Uny連民政事務局局長曾德成都吸引到，有次德成局長專登問葉太點解收埋呢啲黨員，搞到葉太都唔知點答。
趙哲妤唔再接比堅尼job
Uny話如果葉太手袋真係有佢剪報，證明個黨好重視佢，反而覺得鼓舞。但Uny話行性感路線係工作一部分，好難一下子唔性感，不過已經應承葉太唔會接比堅尼工作，以免太暴露。Uny回應得頭頭是道，都算有政治觸覺。
卓妮