中環出更：金刀梁遭陳家強 特「燈」揼心口
唔少行政會議成員都係政商界名人，「水」源充足。尋日一間社會企業就拍賣一盞汽車舊零件循環再造嘅枱燈，由財經事務及庫務局局長陳家強主持拍賣。不過因現場反應唔多熱烈，陳家強惟有向兩位前行會成員揼心口，結果係由該社企嘅主席以九千蚊將盞燈捧返屋企。
拍賣會被點名叫開價
尋日社企鑽的第六部無障礙的士投入服務，仲拍賣一盞由無障礙的士嘅避震器循環再造嘅枱燈，為社企籌款。拍賣會由陳家強同鑽的行政總裁梁淑儀（Doris）主持，盞燈底價係六千二百八十八蚊，兩位臨時拉伕嘅「拍賣官」等咗好耐都冇咩人舉手競投，陳家強惟有向梁智鴻（金刀梁）同夏佳理（阿Ron）埋手，點名叫開價。金刀梁勉為其難叫價八千蚊，阿Ron就以八千八百八十八蚊投得，但就攞番出嚟再競投，最後由鑽的董事會主席倪以理以九千蚊投得。
Doris為咗鑽的嘅業務可謂諗盡計仔，佢諗到食住啟德郵輪碼頭啟用個勢，同哥哥設計無障礙旅遊路線包車套餐，希望外地嘅輪椅使用者都可以嚟香港玩。Doris嘅努力令佢成為首位喺「卡地亞靈思湧動女性創業家獎」亞太區組別入圍嘅港產女創業家，下個月佢就會去法國參加總決賽，可唔可以突圍而出，大家就要拭目以待喇。
卓妮