政情：偷拍愛女婚紗照 樹根畀人趕
立法會仍然休緊會放暑假，其中議員鍾樹根就話，早前喺啱啱休會嘅時候，同太太去咗北海道做狗仔隊喎，莫非去追星？原來佢係跟住即將出閣嘅囡囡去影婚紗相。樹根本身係攝影發燒友，梗係諗盡方法同在場攝影師鬥影相啦，點知搞到攝影師嫌佢阻手阻腳，要好婉轉咁趕佢走。
攝影師嫌阻碇
樹根今次同太太去北海道，主要睇囡囡影婚紗相，順便去埋旅行。當佢哋去到富良野時，樹根見到咁多薰衣草，梗係攞出佢嘅靚相機影花啦。不過，當愛女着起婚紗，樹根自然連花都唔影，要追住個女。於是佢成個過程就係咁追住囡囡同未來女婿影相，又偷拍，又抓拍。
結果搞到負責影婚紗相嘅攝影師要呃完再氹咁想盡辦法使開樹根，除咗話幫佢哋免費影一張全家幅外，又示意山上面啲花更靚。樹根笑言，佢聽到攝影師咁講，就知道攝影師想叫佢同太太影完呢張相，好乖乖上山自己影吓花，唔好阻住晒喎。