立法會議員梁美芬上屆會期除咗出名捉老鼠，又喺泛民主派「五區公投」之後，政府推出替補機制期間發表「懲罰選民論」，搶盡鎂光燈，但唔知係咪今屆立法會多咗聲大大嘅蔣麗芸等多嘴之人，感覺上佢好似沉寂咗好多。不過，梁美芬今個暑假又再蠢蠢欲動，既成立通識科關注組外，佢幾年前牽頭成立嘅「華人學術網絡」，尋日仲諗住搞個政改研討會，點知臨時取消，因乜解究？
梁美芬話，佢老公城大法律學院院長王貴國，兩至三個月之前去旅行嗰陣，腰椎盤已經有事，呢幾日都有啲痛，佢諗住都無乜事，打算照樣出席研討會。
點知老公尋日痛得好犀利，所以要急急入醫院。雖然最後發現唔係好大件事，但係都要留院幾日，所以決定到九月底至十月初先擇日再開政改研討會。
不過，佢之後又話，「華人學術網絡」將來會就政改有所定調，若果尋日召開研討會，睇怕嚟緊幾日都唔得閒照顧老公。莫非佢已預期呢個時候講政改會好惹火？