政情：科大開學 校長師生夾Band
每逢開學日，都不外乎係學生集會聽校長訓話，但科技大學校長陳繁昌今年就打破悶局，拎起支電結他與師生一齊Jam歌夾Band，貫徹「不做辦公室校長」。大家都被陳校長嘅強勁活力深深感染，跟住音樂節奏手舞足蹈，場面好似睇演唱會咁熱鬧。
着圍裙派生果傳正能量
陳繁昌喺尋日舉行嘅科大「Rock the World」迎新會上，脫下厚重西裝褸，捲起衫袖彈電結他，同副校長翁以登、李行偉等管理層大唱《I Believe I Can Fly》、Beyond嘅《不再猶疑》等經典金曲，勉勵學生建立信心，追求理想。台下師生都聽得好投入，個個拎住打氣棒擊出節拍，又跟住一齊唱，情緒high爆。
陳校長又大打溫情牌，着起圍裙化身「派遞員」，為每位同學送上生果，象徵健康生活及正能量，之後逐一走訪課堂歡迎同學。最後佢同學生代表齊為巨型環球蛋糕插上科大嘅「紅鳥」標誌，喻意科大師生面向世界，為國際作出貢獻。