政情：拋錯書包又「吳得掂」
人稱「吳得掂」嘅教育局局長吳克儉，幾乎每隔兩三個月就會爆出蝦碌嘢，當中以立法會用手機睇股票最為經典，絕對要幾趣有幾趣。尋日開學日，吳得掂去大埔視察開學情況時又再拋錯書包，佢話同副局長楊潤雄「分道揚鑣」分別去唔同地方視察，搞到在場記者以為佢哋是但一個跳船唔撈。之後新聞處仲離譜，出稿時竟然連「分道揚鑣」四個字都夠膽變走埋，唔通呢啲就叫開誠布公？
其實吳得掂同楊潤雄識得分工合作，去唔同學校視察開學日情況，照計都係好事，但偏偏吳得掂亂用「分道揚鑣」來形容二人分工合作，結果就鬧出笑話喇。「分道揚鑣」明明解作兩人有唔同志向，各走各路互不相干嘅意思，如果屬實，即係話佢同楊潤雄鬧不和，聽聞當時一班記者聽完佢講後都一臉疑惑，心諗呢啲低級錯誤竟然發生喺一個主管教育事務嘅高官身上，你話幾咁諷刺呢？
去小學致詞大放笑彈
視察完開學情況，吳得掂就轉去一間小學致詞，繼續發放笑彈。佢話自己細細個都試過硬背英文字典，仲即場示範背出「a-b-o-u-t大約」，但佢後來先發現背完生字都唔識用，好彩有師兄教佢其他方法至識運用造句。既然無用，佢又點解要教在場學生背字典呢？落區做完騷後，新聞處就代為出稿，但就自動波將最重要嘅「分道揚鑣」呢四個字變走咗。如果記者無去現場採訪，根本唔知道吳得掂亂講嘢，亦唔知道新聞處做咗手腳。
新聞處「食字」遮醜 ?
據了解，今次唔係教育局要求新聞處補鑊，而係有新聞官懶醒咁覺得「分道揚鑣」同「分工」差唔多意思，所以就將前者刪走，直接寫「分工」就算數。其實新聞處都唔係第一次咁做，之前都有試過漏咗官員講話幾個字，令說話意思掉轉晒，最終搞出大頭佛，睇嚟新聞處處長黃偉綸似乎無吸取上次教訓，無教精前線新聞官要「原汁原味」全文照錄喎。今次黃偉綸「食字」食得咁飽，唔知吳得掂會唔會講聲多謝呢？