中環出更：修讀八年 李煥明「博」到喇！
好學不倦嘅IT界才女、菁英會李煥明（Wendy），八年來半工讀南澳洲大學工商管理博士課程，日前終於修成正果，親赴南澳洲阿德萊德（Adelaide）着博士袍行畢業禮。Wendy笑言，苦讀期間最難捱係第七年，深怕自己畢唔到業，幸而努力最終都冇白費，佢即時致電向加拿大居住嘅父母報喜，仲打算請晒全班同學食飯添！
興趣統統放埋一邊
為咗成為Dr. Lee，Wendy八年間犧牲唔少私人時間，將最愛嘅行山、打高爾夫球等興趣統統放埋一邊，facial都做少好多，一得閒就匿喺圖書館自修，唔到打烊都唔捨得走。雖然今次南澳洲之行只得兩日，但Wendy都爭取時間享受，食盡生蠔、焗蠔、薑蔥蒸蠔配白酒，回味無窮。
Wendy話，呢個博士課程係由大學派教授來港授課，所以佢從未踏足學府，今次終於可親身見識，仲化身小粉絲同靚仔校長David Lloyd合照。讀書會上癮，Wendy話，嚟緊打算進修法律，繼續增值自己。
卓妮