中環出更：施家旅行 暢泳醫痛
早前颱風尤特來去匆匆，香港掛起八號波當日，原來廠商會會長施榮懷（Irons）冒住颱風飛去蘇梅島，展開四日陽光之旅，把握機會狂游水，奇迹地醫好困擾佢幾個月嘅坐骨神經痛。今次「施家旅行」夠晒齊腳，除咗Irons同太太，仲有由美國返港放暑假嘅大仔湧樂及次子仲樂，加埋細女曉雯，浩浩蕩蕩出發。
舉家蘇梅遊 騎象兼按摩
難得齊晒人，Irons好珍惜，陪家人騎大象穿梭森林，點知鬼咁多蚊，騎一陣就算喇。佢哋於是返酒店做腳底及泰式按摩，價錢平到笑，每小時只係港幣五十元，平過「深圳價」，但對於患有坐骨神經痛多時嘅Irons，就點按都唔掂，最後日日跳落泳池狂游水，估唔到痛楚不藥而愈，腰痛仲好番八、九成，連行步路都爽過人。
咁都未算，Irons企埋鏡一照，全身曬得古銅色，自己都忍唔住笑出來。佢話今次以「溫火」慢慢曬，效果好正，睇落成個後生晒喎。蘇梅島水清沙幼，每逢初一、十五都有狂歡派對，吸引唔少年青人聚埋飲酒，其至吸毒，Irons知道後不忘勸戒兒子話：「呢啲Party你兩個唔去得o架！」自細聽教聽話嘅湧樂同仲樂聽見當然話唔會去啦！
卓妮