深水埗區兩個新大型屋邨相繼落成，區內多名區議員早就蓄勢待發，向準備入伙嘅居民提供全方位服務，力爭屋邨成為自己嘅票倉。但估唔到連邊個區議員獲房屋署安排睇樓，甚至屋邨單位圖則都要爭一餐，更觸發「蝕底咗」嘅民建聯（民記）區議員聯同獨立議員，上書區議會大控訴，要求房署嚴肅調查今次事件。
事緣民記陳偉明、鄭泳舜發現民協議員早前向居民派發嘅入伙宣傳品，竟然附有新屋邨嘅圖則同單位間隔等資料。
另一方面，民協高調喺社交網上載早前獲房署安排參觀長沙灣邨單位相片，遠至屋邨外觀，近至屋邨信箱都有。
向來喺區議會佔優嘅民記眼見自己喺深水埗區得唔到同等待遇，決定將件事擺上枱，向房署攞番個公道。
不過，綜觀深水埗區問題多籮籮，唔係話搶到屋邨圖則就可以定勝負，同時亦搞到房署要花時間去解決政治爭拗，到頭來又係新屋邨居民損失，睇怕呢次事件都有排搞。