中環出更：林亮獻膠鴨省工展招牌
早前巨型Rubber Duck風靡全城，但巨鴨走後，市民難掩失落。不過，幾個月後大家可能有機會見到另一隻經典巨鴨，因為多得工業家林亮（林伯）獻出第一次，佢會同中華廠商聯合會（廠商會）合作，將其當年紅極一時嘅可愛黃色經典膠鴨仔變成年底工展會嘅吉祥物，林伯仲與時並進同意更改經典鴨仔嘅外貌造型。廠商會展覽服務有限公司主席吳永嘉（Jimmy）就拍心口物色設計師同廠家打造工展吉祥鴨。
變活動吉祥物 勢掀熱潮
為幫工展會打氣，林伯月前主動聯絡Jimmy，交出早於四十年代繪畫嘅膠鴨手稿，希望以傳統工業撐工展會，並作慈善義賣，回饋社會。Jimmy找來兩位專業設計師為林伯嘅經典鴨仔設計注入新靈感，包括將鴨眼睛改成水汪汪眼睛，鴨嘴角更彎更翹，睇落笑容更甜，同時會設計一個鴨家族，包括鴨爸、鴨媽、鴨仔同鴨女，各有唔同造型，等市民集齊一套。究竟工展吉祥鴨到底會係乜樣呢？下月面世就知喇。
林伯雀躍話，佢隻經典鴨仔當年係以嶄新物料，打敗日本以「賽璐珞」物料製造嘅鴨仔，記錄咗本港玩具業一段光輝及辛酸兼備嘅歲月，又係無數市民嘅集體回憶，所以就算多年來已經唔再出售，但係佢間玩具廠間唔中仲會生產鴨仔送畀人，累計已送出超過一萬隻。最近香港又興起鴨仔熱潮，唔少機構都搵林伯合作搞活動，好多學校亦搵佢演講，同學生分享當年做工業嘅心路歷程，希望有所啟發。
卓妮