最近商界盛傳民主黨主席劉慧卿動作頻頻，不時透過中間人相約有分量嘅商界人士會面、甚至飯局。話題當然離不開政改，有人透露卿姐言談間表明，泛民只會推舉一人參選特首，以免分散票源，講到好似自己有興趣出選咁。
據聞卿姐相約商界中人食飯，係幾個月前開始。由於卿姐商界人脈唔多，每次都靠「中間人」搭路。而卿姐同商界人士強調，泛民最怕二○一七有篩選，點知有人心水清反問卿姐，「咁你哋搞泛民預選，咪即係篩選？」該商界中人又立即打圓場話，預選同篩選唔同，就算泛民中人預選落敗，都可照舊參選特首。卿姐聽完之後即刻點晒頭話「咪係囉！咪係囉！」
商界中人對卿姐「突然主動」約傾特首選舉，都感到少少奇怪。我哋問番卿姐所為何事，佢話自己唔熟商界人士，所以只靠立法會幾位商界議員幫手，約其他商界中人傾下偈。至於係咪放風想選特首，卿姐話無咁嘅事，只係交流下意見喎。到底卿姐同商界朋友嘅理解點解咁大差異，咁就真係要留意事態發展喇。