政情：公民講場：「免費」撐村民 發叔算到盡

政府突然將大浪西灣十七公頃土地劃為郊野公園，令本來擁有土地嘅原居民得地無所用，西灣村村民月初就成功申請法援，準備向政府提出司法覆核。鄉議局主席劉皇發講明會全力支持村民，但就話局方無錢，唔可以提供資助，只能夠提供重要文件同法律意見畀村民喎。嘩，鄉議局都嗌無錢？其實今次鄉議局轉做幕後推手，確係進可攻、退可守，就算村民輸官司都唔關局方事，但相反贏咗官司就可以出來攞威，仲可以成為案例，防止政府日後再凍結鄉郊土地，發叔呢個如意算盤算得認真盡喇。