政情：莊陳有玩智能手機冇難度
現時使用智能手機咁普遍，但失明人士又用唔用到呢？失明人協進會會長莊陳有日前出席一個活動時，就二話不說喺褲袋拿出一部智能手機，即場示範操作，用得頗為揮灑自如。佢話只需開啟手機嘅發聲功能，以及貼上一塊價值約八十元嘅凹凸字屏幕貼，就可以好似普通人一樣咁使用，玩WhatsApp等通訊軟件都冇難度。
倡當局多發展融合教育
今年高考放榜嘅焦點，莫過於憑唇讀「吻」出佳績嘅失明弱聽學生曾芷君，莊陳有話早年已識對方，好欣賞芷君自創唇讀方法，排除萬難達到目標。佢話無論係身體殘障抑或健全嘅人，都有唔同程度嘅限制，所以每人都應有一顆積極發掘潛能嘅心。
對於殘障人士學習較一般人困難，莊陳有話，希望政府多放資源發展融合教育，即係讓一般兒童與身心障礙兒童一同學習，以及進一步推廣無障礙電子書。佢又話，讀寫障礙及失去手部等人士都好需要電子書，但需要港府修例，以便與國際條例接軌。