政情：名廚鬥減磅 輸家扮女侍應
由廚房鬥到健身房嘅兩大米芝蓮名廚Harlan Goldstein及Alvin Leung，尋日公布三個月地獄式減肥後嘅賽果，Harlan以減去逾四十五磅，擊敗只減去三十七磅嘅Alvin，後者將於十一月接受大懲罰，打扮成女侍應到對方嘅餐廳工作一晚。Alvin笑言，到時肯定會化妝喎！
瘦身效果大 太太最開心
瘦咗一大截嘅Harlan同之前判若兩人，雙下巴、大肚腩消失，血脂、糖尿、血壓回復正常，最開心莫過於佢太太Helen喇！Helen話，識老公嗰陣仲瘦過依家，見住佢日漸「吹脹」，曾經以離婚迫令佢減肥無果，幸而今次的起心肝勤做運動，並戒掉最愛嘅紅肉同紅酒。從前四十幾吋腰嘅Harlan着唔落牛仔褲，依家可以任着唔嬲喇。
瘦咗嘅Alvin望落亦年輕咗，佢笑言今次係雙贏，二人都搵番健康同自信。佢仲即場向Harlan再下戰書，要喺未來兩個月保持依家嘅磅數，至於懲罰就話要諗吓先。至於二人之前各押下嘅二萬元注碼，將如期捐畀慈善機構。