中環出更：梁宏正雙喜臨門
繼香港青聯主席霍啟剛就快做爸爸後，新任菁英會主席梁宏正（Clarence）都雙喜臨門，除咗升呢做主席外，太太都懷孕三個月。首次做爸爸，Clarence心情興奮，未知肚內BB的性別，佢話仔女都無所謂，仲講笑話佢家族近年生產埋嬰兒童裝衫，不論係男B定女B，都大把靚衫着。
菁英會早前喺會展舉行第六屆執委會就職禮，逾五百賓客到賀，冠蓋雲集，梁宏正父親、立法會議員梁君彥專登嚟撐個仔，Clarence太太張曉君就坐喺台下，為老公打氣。一眾菁英兄弟知道Clarence就快做老竇，爭住碰杯恭喜。啟剛亦快將升任做爸爸，兄弟都戥佢開心，齊豎起拇指讚叻。睇嚟富二代圈子，後繼有人嘞。
廖偉麟大手掃物業
轉過頭，卓妮撞到有「樓神」之稱嘅廖創興家族後人廖偉麟（Jeffrey），佢靜觀市道半年後，近日又再出擊，睇準日本及美國房地產，打算斥資六至十億港元掃貨。Jeffrey話，日圓近月大幅貶值兩成，唔少商舖變得超抵買，單係收租，都有十厘回報。過去幾個月，Jeffrey已頻頻飛日本睇舖，做足功課，當中以大阪商舖最吸引，貪佢唔似東京咁，容易發生地震。Jeffrey日內將飛往當地掃舖，之後再會去美國加州及三藩市買舖，專攻銀座式商場。咁香港物業呢？佢話係時候入貨，月前斥資兩億多港元，分別購入地舖及三千呎寫字樓，一於人棄我取喎。
卓妮