有關方面籲勿遲到早退
港區人大每年都有「一長一短」考察行程，其中短程已喺五月下旬到茂名同湛江，當時只有約二十名港區人大出席。事隔三個多月後，長程將會於下月一日至九日到吉林考察，有港區人大私下話本來想去三、四日就走人，但有關方面知道後特別提醒大家最好唔好遲到早退。
有人認為呢個「溫馨呼籲」絕不尋常，估計今次考察團「有料到」，甚至可能有特別嘉賓或領導人現身，或者談及最熱門嘅政改問題都唔出奇。翻查資料顯示，前年亦曾試過有京官南下同正在南京考察嘅港區人大舉行座談會。不過，亦有人估計，今次係港區人大換屆後首次長途考察，希望齊齊整整出發顯示隊形先係主因，究竟考察團會否有意外收穫，相信好快就會知。