中環出更:草原踎低 蔡敏思遭「蠍子」傷

去旅行唔一定去歐洲至好玩,香港青年聯會常務會董蔡敏思(Mence)就鍾意踏足神州大地,體驗簡樸生活。早前佢就同相識數十載嘅小學同學孖住遊新疆,漫步薰衣草園,於草原上玩羊仔,又到蓮花池採食爽脆嘅新鮮蓮子。Mence笑言,與老友首次把臂同遊,感覺好似回到小學時代,全程柴娃娃乜都玩餐飽,心境開朗,個人都年輕啲。

麻痹劇痛 幸有解藥

今次Mence同女友人首次去新疆,先飛武漢再轉機到烏魯木齊,最後坐小型機抵達新疆伊犁那拉提草原,玩足八日。二人走到浩瀚草原上感受大自然清新氣息,欣賞蒙古包美景,又品嘗以提子乾、甘荀及薑黃製成嘅「手抓飯」,大讚風味十足。不過,Mence話今次旅程最難忘嘅,都係遇上「蠍子草」。

話說當日佢哋喺草原上人有三急,附近又冇洗手間,於是各自搵地方「解決」。點知二人蹲下之際,雙雙發出尖叫聲,原來係被草地上嘅「蠍子草」拮親,傷口即時麻痺兼劇痛,嚇到花容失色。好彩導遊教路話,每逢有「蠍子草」附近必有解藥,即時為佢哋解毒,認真有驚無險。

卓妮

第一手消息請下載on.cc東方互動iPhone/iPad/Android/Windows Phone Apps