政情：鍾國斌護髮 戴帽擋驕陽
立法會議員鍾國斌（Felix）作為紡織及製衣界代表，向來對衣着好緊張，無論開咩會都要着到型一型先見人，但估唔到佢原來仲緊張一把秀髮。話說Felix早前一家幾口去土耳其同希臘玩，攝氏三十八度高溫下差唔多日日都戴帽，唔係驚中暑，而係驚曬燶啲頭髮，佢咁識保養，抵佢啲頭髮咁濃密。
驚陌生人摸 拒土耳其浴
講番今次歐亞之旅，Felix話大多數係睇名勝古蹟，但土耳其最出名嘅奇石林熱氣球同土耳其浴就冇試過，事關基於熱氣球安全問題，有關方面都唔鼓勵遊客去玩，而佢本人就好怕被陌生人摸來摸去，所以都冇試土耳其浴喇。
至於遊覽希臘，雖然同樣有好多歷史名勝，但最令Felix感興趣嘅竟然係當地嘅百貨公司。Felix話照計七月未算係零售淡季，但好多百貨公司都已經四、五折大減價清貨，可想而知當地經濟有幾咁差。