政情：鬍鬚曾見波不救？
主責推動新界東北發展計劃嘅發展局局長陳茂波，最近捲入家人涉囤地利益衝突疑雲，日前其政治助理何建宗又因漏報潛在利益辭職而再掀爭議。有建制派獻計將發展計劃易帥重新上路，其中一招係成立由司長出任主席嘅獨立委員會，即係要茂波嘅上司、財政司司長曾俊華（鬍鬚曾）披甲上陣。不過，有人睇到鬍鬚曾連日未見力撐茂波，加上佢早前被「梁粉」狠批做不到應使則使會成為歷史「大罪人」，因此鬍鬚曾未必會肯「接波」。
東北發展或拒「替補」
新界東北發展計劃因茂波爆出利益衝突疑雲處於膠着狀態，行政會議成員葉劉淑儀近日建議當局考慮為發展計劃成立獨立委員會，由鬍鬚曾或政務司司長林鄭月娥做主席，特首梁振英尋日被問及此事時疑似留有空間，未有立即一口說不。其後，身兼行會成員嘅「三料議員」李慧琼亦話，從發展計劃順利推展角度出發也樂見有委員會成立，支持鬍鬚曾參與呢個委員會，即時惹來政圈揣測政府係咪評估緊成立委員會嘅可能性。
事實上，有政界中人形容由鬍鬚曾擔任「救波」主將係順理成章，一來鬍鬚曾係茂波嘅上司，下屬有難，作為上司自然要攬上身，二來鬍鬚曾做問責官員前，曾出任房屋及規劃地政局常任秘書長（規劃及地政），一旦要「替補」上陣都唔使由零開始。
設獨立委會 恐反效果
不過，有「梁粉」就大潑冷水質疑成立委員會嘅成效，事關有人揚言只要一日茂波做局長，就會拉布拖垮當局工作，究竟成立委員會係咪可以解決問題，實在好難講。
有官場中人則評估，若然將來真係成立委員會，茂波成為委員會當然成員，變相未有解決利益衝突問題，而發展局嘅作用亦變得可有可無，會否弄巧反拙壯大「倒波」聲勢，呢方面必須留意。講到尾，呢場政治風「波」能否解決，就要睇吓鬍鬚曾係咪當自己玩緊「閃避球」比賽，一味閃避個波，唔肯接波，否則「救波大計」講到幾天花龍鳳都冇用。