中環出更：意國自駕遊 王英偉刮花名車
藝術發展局主席王英偉（Wilfred）月前同太太簡美蓮半公半私，前往意大利出席一個國際藝術活動後，再自駕遊享受二人世界，去勻米蘭、日內瓦等六個城市，玩足兩星期至返港。平時喺香港慣有司機接送嘅Wilfred，自言好耐冇做過「柴可夫」，去到當地租用名貴靚車，首日就因為揸唔慣左軚車兼唔熟路，不慎刮花車身，幸而一早買咗保險免破財。
住名牌酒店 「合晒合尺」
遊米蘭期間，Wilfred夫婦入住一間五星級意大利名牌主題酒店，身為該品牌忠實粉絲嘅佢，對酒店非常滿意。佢形容，酒店主要家具都係該品牌出品，合晒佢「合尺」，而佢最欣賞嘅設施，係房門與房內之間有一個玄關相隔，可以隔音兼保障私隱。佢又大讚酒店夠先進，內裏設施全自動遙控，落到餐廳仲有透光地板，設計時尚，兩公婆都住得好開心喎。
Wilfred年中坐唔少飛機，自有一套抗時差妙方，就係由上機出發到目的地，一路都「金睛火眼」捱眼瞓，直到當地夜晚先至大覺瞓天光，一晚就適應到時差。佢仲話，自己去到邊瞓到邊，可以隨時「叉電」，難怪佢忙極都咁精神喇。
卓妮